O‘zbekistonda haydovchilarga taqiqlovchi belgilar ostida to‘xtashga ruxsat beriladi

O‘zbekiston Respublikasi Ichki ishlar vazirligi Jamoat havfsizligi departamenti Yo‘l harakati havfsizligi hizmati matbuot xizmati axborot xabarini e’lon qildi.

Xabarga ko‘ra, O‘zbekistonda "To‘xtash taqiqlangan" va "To‘xtab turish taqiqlangan" yo‘l belgilari amal qilish tartibiga o‘zgartirishlar kiritiladi. Endilikda haydovchilarga ushbu belgilar amal qiluvchi hududlarda yo‘l harakati xavfsizligiga, boshqa transport vositalariga va yo‘l infratuzilmasiga to‘sqinlik qilmagan holda ma’lum vaqt davomida to‘xtashga ruxsat beriladi. Belgilar ostida ularning amal qilish vaqtini ko‘rsatuvchi qo‘shimcha belgilar o‘rnatiladi.

Mazkur o‘zgarish yo‘l harakati xavfsizligini ta’minlash, tirbandliklarni kamaytirish hamda haydovchilar uchun qulay shart-sharoitlar yaratish maqsadida joriy etilmoqda.

Ta’kidlanishicha, ushbu ruxsat faqat belgilangan qoidalarga rioya etilgan holda amal qiladi. Yo‘l harakati xavfsizligi qoidalarini buzish yoki transport vositalari harakatiga to‘sqinlik qilish holatlari haydovchi uchun ma’muriy javobgarlikka sabab bo‘ladi.