Toshkentlik fuqaroning xonadoni auksionda sotiladi

Toshkent shahar Majburiy ijro byurosi matbuot xizmati xabariga ko‘ra, poytaxtlik fuqaroning katta miqdordagi qarzi mavjud.

Shayxontohur tumanlararo fuqarolik ishlari sudi qaroriga asosan Toshkent shahar Majburiy ijro byurosiga bank foydasiga 844,77 million so‘m undirish haqida ijro hujjati kelib tushgan. Qarzdorlik kreditning o‘z vaqtida qaytarilmagani sabab yuzaga kelgan. Sud qaroriga muvofiq, bank foydasiga garov sifatida qo‘yilgan, Toshkent shahri Mirzo Ulug‘bek tumanidagi TTZ-3 massivida joylashgan xonadon undirib berilishi belgilangan.

"O‘zbekiston Respublikasida sud hujjatlari va boshqa organlar hujjatlarini ijro etish to‘g‘risida"gi Qonunning 23-moddasiga muvofiq ijro ishi qo‘zg‘atilib, qarzdorga bank foydasiga qarzni ixtiyoriy tartibda to‘lash majburiyati yuklatilgan. Qarzdor qonuniy talabni belgilangan muddatda bajarmagach, majburiy ijro choralari qo‘llanib, joriy yil 19-sentabr kuni guvohlar, tegishli tashkilotlar vakillari va undiruvchi ishtirokida kvartiraga xatlov (arest) qo‘yilgan.

Qarzdor 844,77 million so‘m miqdoridagi qarzni belgilangan muddatda to‘lamagani sababli, Byuro inspektori ko‘chmas mulkni elektron onlayn auksionga chiqarish to‘g‘risida qaror qabul qilgan. Hozirda arest qilingan uy-joyni auksion orqali realizatsiya qilish choralari ko‘rilmoqda.