Toshkent dunyoda havosi eng yomon bo‘lgan shaharlar orasida 10-o‘rinni egallamoqda

O‘zbekiston Respublikasi Gidrometeorologiya xizmati markazi matbuot xizmati ma’lumotiga ko‘ra, Toshkent shahridagi atmosfera havosi monitoring stansiyalaridan olingan ma’lumotlar e’lon qilindi.

Joriy yil 24-sentyabr kuni soat 09:00 holatiga ko‘ra, Toshkent shahri hududida atmosfera havosida PM2,5 zarrachalari me’yoridan yuqori darajada qayd etilgan. Ularning miqdori 38,23 mkg/m3ni tashkil etib, bu ko‘rsatkich SanQvaN 0053-23 me’yoridan 1,09 baravar yuqori. Ma’lum qilinishicha, belgilangan me’yor 35 mkg/m3ni tashkil etadi. Shu bilan birga, PM10 zarrachalari miqdori 110,08 mkg/m3 bo‘lib, belgilangan me’yorlardan oshmagan. Uglerod oksidi miqdori ham me’yor doirasida qolgan.

IQAir xalqaro platformasi ma’lumotlariga ko‘ra, Toshkent shahri havosi eng ifloslangan shaharlar orasida dunyoda 10-o‘rinni egallagan. Shahar ifloslanish indeksi 93 birlikni tashkil etib, bu o‘rtacha ko‘rsatkich sifatida qayd etilgan. Reytingda 9-o‘rinni Malayziyaning Kuching shahri, 8-o‘rinni Bangladesh poytaxti Dakka va 7-o‘rinni Xitoy poytaxti Pekin shahri egallab turibdi.