Ekologlar saksovul kesgan buxoroliklarga katta miqdorda jarima solishda davom etmoqda

Huquqbuzarga nisbatan chora ko‘rildi, deb xabar beradi Buxoro viloyati ekologiya boshqarmasi matbuot xizmati.

Buxoro viloyatining Olot tumanida ekologiya inspektorlari tomonidan reydlar o‘tkazildi. Reydlar vaqtida Kirtay MFY cho‘l hududida o‘zining UAZ rusumli yuk mashinasida kesilgan saksovul daraxtlarini olib ketayotgan erkak topildi. Ularni o‘zi kesib tashlaganligi ma’lum bo‘ldi.

Mazkur shaxsga nisbatan O‘zbekiston Respublikasining Ma’muriy javobgarlik to‘g‘risidagi kodeksining "Daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish" moddasi 1-qismi bilan ma’muriy bayonnoma qo‘zg‘atildi. Erkak 10 300 000 so‘m jarimaga tortildi. Shuningdek, undan atrof-muhitga yetkazilgan zarar uchun 20 million 188 ming so‘m tovon to‘lashi ham talab qilinadi.

Ma’lumot uchun: Saksovul cho‘lda vatani daraxtga o‘xshash o‘simlik hisoblanadi. Uning asosiy xususiyati cho‘l tuprog‘ini shamollardan himoya qilish va eroziyaning oldini olish qobiliyatidir. Bu cho‘llanishning oldini oladi va cho‘l ekotizimlarini saqlaydi. Saksovulning tanasi qiyshiq va silliq. Uning shoxlari qalin va yashil rangga ega. Gullash davrida pushti va qip-qizil gullar paydo bo‘ladi. Ko‘rinmas bo‘lishiga qaramay, uning kuchli ildiz tizimi cho‘l va toshloq joylarda mustahkam o‘rnashish imkonini beradi.