Samarqandda qirg‘ovullarni noqonuniy o‘ldirgan ovchilar jazolanadi

Samarqand viloyati ekologiya boshqarmasi matbuot xizmati huquqbuzarlarga qanday jazo tayinlangani haqida xabar berdi.

Ijtimoiy tarmoqlarda Samarqand viloyati Pastdarg‘om tumani Sharof Rashidov qishlog‘ida ikki erkak noqonuniy ov qilayotgani haqida xabarlar tarqaldi. Shundan so‘ng voqea joyiga Nurobod tumanidan ekologiya inspektorlari yuborilib, vaziyat o‘rganildi.

Inspektorlar qonunbuzarlikka Pastdarg‘om tumanidagi "Turkman" mahalla fuqarolar yig‘inida yashovchi ikki nafar fuqaroning aloqadorligini aniqladi. Huquqbuzarlar dashtda zarafshon qirg‘ovullarini ovlash uchun ikkita ov miltig‘idan foydalangan.

Huquqbuzarlarga nisbatan O‘zbekiston Respublikasining Ma’muriy javobgarlik to‘g‘risidagi kodeksining "Ov qilish va baliq ovlash qoidalarini, shuningdek hayvonot dunyosidan foydalanishning boshqa turlarini amalga oshirish qoidalarini buzish" moddasi 4-qismi bilan ma’muriy bayonnomalar rasmiylashtirildi. Ularga 50 dan 70 gacha bazaviy hisoblash miqdorining (20 600 000 so‘mdan 28 840 000 so‘mgacha) jarima solinadi. To‘plangan barcha ish materiallari huquqiy baho berish uchun huquqni muhofaza qiluvchi organlarga taqdim etilgan.