Andijonda daraxtni noqonuniy kesib tashlagan erkak endi katta miqdorda jarima to‘laydi

Huquqbuzarga nisbatan chora ko‘rildi - Andijon viloyati Ekologiya vazirligi matbuot xizmati xabar berdi.

Har bir mahallada ekologiya inspektorlari tomonidan atrof-muhitni muhofaza qilish to‘g‘risidagi qonun hujjatlariga rioya etilishi ustidan muntazam nazorat olib borilmoqda. Ushbu chora-tadbirlar hududdagi ekologik vaziyatni yaxshilash, daraxtlarni muhofaza qilish ishlarini yanada samarali tashkil etishga qaratilgan.

Ekologiya inspektorlari tomonidan o‘tkazilgan navbatdagi profilaktika tadbiri davomida Buloqboshi tumanidagi "M.Ismoiliy" MFY qarashli hududda, yo‘l chetidagi do‘kon yonida daraxtlarni noqonuniy kesish holati aniqlandi. Erkak katalpa daraxtini noqonuniy ravishda kesib tashlagani aniqlangan.

Mazkur shaxsga nisbatan O‘zbekiston Respublikasining Ma’muriy javobgarlik to‘g‘risidagi kodeksining "Daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish" moddasi 1-qismi bilan ma’muriy bayonnoma qo‘zg‘atildi. Unga 10 300 000 so‘m jarima solingan. Shuningdek, unga yetkazilgan 4 120 000 so‘m moddiy zararni qoplashi kerak bo‘ladi.