Toshkent ifloslangan shaharlar bo‘yicha jahon reytingida yuqori o‘rinlarni egalladi

O‘zgidromet matbuot xizmati Toshkent shahridagi atmosfera havosining holati bo‘yicha rasmiy ma’lumot e’lon qildi.

Joriy yil 20 oktabr soat 09:00 holatiga ko‘ra, avtomatik monitoring stansiyalari poytaxtda PM2,5 zarralarining SanQvaN 0053-23 me’yoridan 2,1 baravar oshganini aniqladi. Ularning miqdori 74,72 mkg/m3 ni tashkil etgan, me’yor esa 35 mkg/m3. Boshqa ifloslantiruvchi moddalar ko‘rsatkichlari normal holatda qolmoqda: PM10 zarralari 193,1 mkg/m3 (me’yor 500 mkg/m3), karbon oksidi 0,78 mg/m3 (me’yor 5 mg/m3).

IQAir sayti ma’lumotlariga ko‘ra, Toshkentdagi havo juda zararli hisoblanadi va unga 155 indeks berilgan. Dunyo miqyosidagi eng iflos hududlar reytingida Toshkent 6-o‘rinni egalladi. Shahar yuqorisida joylashgan shaharlarga: Hindistonning Dehli shahri, Pokistonning Lahor va Karachi shaharlari, Hindistonning Mumbay shahri va Kuvaytning Al-Kuvayt shahri kiradi.