Toshkent va Seul sanoatda inqilobga tayyorlanmoqda

BMT Bosh Assambleyasining 80-sessiyasi doirasida O‘zbekiston Prezidenti Shavkat Mirziyoyev va Koreya Respublikasi Prezidenti Li Chje Myon o‘rtasida muhim uchrashuv bo‘lib o‘tdi. 23-sentabr kuni bo‘lib o‘tgan muzokaralarning asosiy yakuni ikki mamlakat o‘rtasida texnologik va sanoat sherikligini chuqurlashtirishga qaratilgan keng qamrovli uzoq muddatli dasturni ishlab chiqish to‘g‘risidagi kelishuv bo‘ldi.

Ushbu tashabbus joriy yilning iyul oyidagi telefon orqali muloqotdan so‘ng rahbarlarning ilk yuzma-yuz uchrashuvi bo‘lib, o‘ziga xos strategik sheriklikni mustahkamlashda yangi bosqichni boshlab berdi. Koreyaning O‘zbekiston iqtisodiyotiga kiritgan to‘g‘ridan-to‘g‘ri sarmoyalari hajmi 8 milliard dollardan oshgani e’tiborga molik bo‘lsa-da, tomonlar so‘nggi paytlarda o‘zaro savdo hajmining pasayishidan xavotir bildirdilar. So‘nggi ma’lumotlarga ko‘ra, joriy yilning yanvar-avgust oylarida tovar ayirboshlash hajmi 1,13 milliard dollarni tashkil etdi, bu o‘tgan yilning shu davriga nisbatan 13,3 foizga kamdir.

Yangi dastur ushbu tendentsiyani o‘zgartirishga qaratilgan bo‘lib, keng ko‘lamli sohalarni qamrab oladi. Xususan, muhim xomashyoni chuqur qayta ishlash, kimyo sanoati, zamonaviy mashinasozlik, agrotexnologiyalar, shuningdek, transport infratuzilmasi, aviatsiya sanoati va biotexnologiyalarni rivojlantirish kabi asosiy sohalarda qo‘shma loyihalarni amalga oshirish rejalashtirilgan.

Li Chje Myon Koreya tomonining iqtisodiy hamkorlikni kengaytirishdan yuqori darajada manfaatdor ekanligini tasdiqladi. Strategik minerallarni yetkazib berish zanjirlari barqarorligini ta’minlash va yirik infratuzilma loyihalarida, jumladan, temir yo‘l va avtomobil yo‘llari, shuningdek, aeroportlarni qurish va modernizatsiya qilishda ishtirok etishga alohida e’tibor qaratildi.

Suhbat davomida Koreya rahbari O‘zbekistonda istiqomat qilayotgan 170 mingdan ortiq etnik koreys diasporasining davlatlararo aloqalarni mustahkamlashga qo‘shgan salmoqli hissasini alohida ta’kidlab, mamlakat rahbariyatidan diasporani bundan keyin ham qo‘llab-quvvatlashiga umid bildirdi.

Ikki tomonlama kun tartibidan tashqari, prezidentlar ko‘p tomonlama hamkorlik masalalarini ham muhokama qildilar. Janubiy Koreyada 2026-yilda o‘tkazilishi rejalashtirilgan birinchi "Koreya - Markaziy Osiyo" sammitiga tayyorgarlik ko‘rish bo‘yicha yaqin muvofiqlashtirishga kelishib olindi. Dastlab tadbir 2025-yilga rejalashtirilgan edi, biroq keyinga qoldirildi.

Uchrashuv yakunida Shavkat Mirziyoyev Li Chje Myonni oliy darajadagi muloqotni davom ettirish va erishilgan kelishuvlarni aniqlashtirish uchun davlat tashrifi bilan O‘zbekistonga taklif qildi.

O‘zbekiston va Janubiy Koreyaning avtomobilsozlik sohasidagi hamkorligi uzoq tarixga ega. Dastlabki va eng muvaffaqiyatli qo‘shma loyihalardan biri - Asaka shahridagi Uz-Daewoo (hozirgi UzAuto Motors) avtomobil zavodi 1996 yilda ishga tushirilgan va ikki mamlakat sanoat kooperatsiyasining ramziga aylangan.