O‘zbekiston biznes-ombudsmeni Rishton tumanidagi fermerlarni himoya qilmoqda

O‘zbekiston Biznes-ombudsmenı matbuot xizmati rasmiy bayonot e’lon qildi.

Ma’lum qilinishicha, ijtimoiy tarmoqlarda Farg‘ona viloyatining ayrim tumanlarida fermerlarga jiddiy bosim o‘tkazilayotgani haqida ma’lumotlar tarqalgan. Aniqrog‘i, Rishton tumanidagi fermerlarga tuman ichki ishlar bo‘limi xodimlari tomonidan bosim o‘tkazilib, ularning qonuniy huquqlari poymol etilmoqda.

Biznes-ombudsmen mamlakatimizda tadbirkorlik subyekti hisoblangan fermer xo‘jaliklari faoliyati qonun bilan kafolatlanganini alohida ta’kidlaydi. Hech kim ularga qarshi asossiz bosim o‘tkazishga yoki zo‘ravonlik qo‘llashga haqli emas.

Biznes-ombudsmen, shuningdek, barcha davlat organlarini, jumladan, huquqni muhofaza qilish organlarini tadbirkorlik subyektlariga nisbatan noqonuniy xatti-harakatlardan tiyilishga chaqiradi. Qayd etilishicha, mazkur ish alohida nazoratga olingan. Hozirda hodisaning barcha tafsilotlari bo‘yicha chuqur tergov olib borilmoqda. Ish tafsilotlari oshkor etilmayapti.