ACWA Power O‘zbekistonga milliardlab dollar sarmoya kiritadi

Saudiya Arabistonining ACWA Power energetika kompaniyasi O‘zbekiston hududida qiymati milliardlab dollarga teng yangi loyihalarni ishlab chiqmoqda. Bu haqda 30-sentabr kuni kompaniya bosh direktori Marko Archelli ma’lum qildi. Uning so‘zlariga ko‘ra, yaqin oylarda yangi energetika quvvatlariga eng muhtoj bo‘lgan hududlarni aniqlash uchun batafsil baholash o‘tkaziladi.

Marko Archelli yangi tashabbuslarning asosiy maqsadi - ishlab chiqarish quvvatlarini joriy 3,5-4 GVt dan 10 GVt gacha sezilarli darajada oshirish ekanligini ta’kidladi. Ayni paytda kompaniya Qoraqalpog‘istonning Qo‘ng‘irot tumanida quvvati 1,5 GVt bo‘lgan yirik shamol elektr stansiyasini ishga tushirish ishlarini ham jadallashtirmoqda.

Avvalroq, iyun oyida bo‘lib o‘tgan IV Toshkent xalqaro investitsiya forumida ACWA Power’ning O‘zbekiston bo‘yicha moliyaviy direktori Sumendra Raut respublika hukumati bilan 5 milliard dollarlik yangi kelishuv imzolash rejalari haqida e’lon qilgan edi. Uning ma’lumotlariga ko‘ra, Saudiya energetika gigantining O‘zbekiston iqtisodiyotiga kiritgan umumiy sarmoyasi hajmi allaqachon 15 milliard dollarni tashkil etadi. Joriy portfel 19 ta energetika loyihasini o‘z ichiga oladi, ularning 18 tasi qayta tiklanadigan energiya manbalariga yo‘naltirilgan.

ACWA Power O‘zbekiston energetika sohasidagi asosiy xorijiy investorlardan biri bo‘lib, butun mamlakat bo‘ylab keng ko‘lamli loyihalarni amalga oshirmoqda. Jumladan, Qoraqalpog‘istonda umumiy quvvati 1,6 GVt (1,5 GVt va 100 MVt) bo‘lgan ikkita shamol elektr stansiyasi qurilmoqda. Ushbu obyektlardan birining qiymati 1,65 milliard dollarga baholanmoqda. Buxoro viloyatining Peshku va G‘ijduvon tumanlarida har birining quvvati 500 MVt bo‘lgan ikkita shamol parkini barpo etish ishlari davom etmoqda. Ikkala loyihaning birinchi bosqichi 2025-yil oxirigacha ishga tushirilishi kutilmoqda va bu maqsadlarga jalb qilingan mablag‘lar hajmi qariyb 741 million dollarni tashkil etdi.

Shamol energetikasidan tashqari, kompaniya boshqa yo‘nalishlarni ham faol rivojlantirmoqda. Samarqand va Toshkent viloyatlarida fotoelektr stansiyalarini yaratish bo‘yicha ishlar olib borilmoqda. Chirchiq shahrida Xitoyning PowerChina kompaniyasi ishtirokida "yashil" vodorod ishlab chiqarish zavodi qurilishi loyihasi amalga oshirilmoqda. Dastlabki qiymati 88 million dollar bo‘lgan ushbu obyekt qurilishini joriy yilning dekabr oyida yakunlash rejalashtirilgan.

Kompaniyaning kelajakdagi tashabbuslari qatoriga Buxoro viloyati va Qoraqalpog‘istonda yangi shamol elektr stansiyalarini qurish (loyiha qiymati - 262 million dollar), Samarqand viloyatida umumiy quvvati 1 GVt bo‘lgan ikkita quyosh elektr stansiyasini ishga tushirish va Toshkent viloyatida 334 MVt quvvatga ega akkumulyatorli energiya saqlash tizimini yaratish kiradi.

ACWA Power tomonidan Qo‘ng‘irot tumanida qurilayotgan 1,5 GVt quvvatga ega shamol elektr stansiyasi loyihasi nafaqat O‘zbekistonda, balki butun Markaziy Osiyo mintaqasidagi eng yirik shunday obyekt bo‘ladi.