Farg‘ona viloyati hokimligi matbuot xizmati Janubiy Koreyaga anor eksporti bo‘yicha ma’lumotlarni e’lon qildi.
Farg‘ona bog‘larida yetishtiriladigan anorlar o‘zining ajoyib ta’mi bilan mashhur. Bu sifat Janubiy Koreyalik iste’molchilarni o‘ziga jalb qiladi. Shu tariqa Farg‘ona viloyati Rishton tumanidagi "RICH FARM EXPO" korxonasi o‘zbek anorlarini ushbu davlatga doimiy ravishda eksport qilmoqda. Korxonada xalqaro standartlarga javob beradigan zamonaviy saralash va qadoqlash tizimi qo‘llaniladi.
Farg‘ona viloyatida 2018-yilda 860 gektar maydonda anor yetishtirildi. Ayni paytda anor bog‘lari qariyb 4800 gektar maydonni egallaydi. 2024-yilda viloyatda 63,5 ming tonna anor yetishtirishga erishildi, shundan 4,2 ming tonnasi eksport qilindi. Yana 9 ming 300 tonnasi qayta ishlashga jo‘natildi. Anorning qolgan qismi mahalliy bozorda sotilgan.