Qoraqalpog‘istonda kriptovalyuta mayningi davlat tomonidan qo‘llab-quvvatlash dasturiga kiritiladi

Qoraqalpog‘iston Respublikasida mayning faoliyati uchun elektr energiyasi iste’moliga maxsus, imtiyozli tarif belgilanadi. Ushbu tashabbus mintaqada yuqori texnologiyali sohalarni, jumladan, sun’iy intellekt (SI) sohasidagi loyihalarni rag‘batlantirish bo‘yicha keng ko‘lamli dasturning bir qismi bo‘lib, ularni amalga oshirish uchun investitsiyalar va preferensiyalar shaklida 100 million dollargacha mablag’ yo‘naltiriladi.

Qo‘llab-quvvatlashning yangi chora-tadbirlari haqidagi qaror 6-oktabr kuni Prezident Shavkat Mirziyoyev raisligida o‘tgan sun’iy intellekt texnologiyalarini rivojlantirish masalalariga bag‘ishlangan yig‘ilishda ma’qullandi. Uchrashuvda SI’ni iqtisodiyot va ijtimoiy sohaga integratsiya qilish bo‘yicha kompleks yondashuv muhokama qilindi, bu malakali kadrlar tayyorlash, oliy o‘quv yurtlari negizida ixtisoslashtirilgan laboratoriyalar tashkil etish va istiqbolli loyihalarga davlat tomonidan yordam ko‘rsatishni nazarda tutadi.

Istiqbolli loyihalar milliy agentligi (ILMA) direktorining birinchi o‘rinbosari Vyacheslav Pak "O‘zbekiston 24" telekanaliga bergan intervyusida maynerlar uchun imtiyozli elektr tariflari joriy etilishi haqidagi ma’lumotni tasdiqladi. "Ushbu qo‘llab-quvvatlash choralari mayning kabi sohani o‘z ichiga oladi va uning uchun elektr energiyasiga imtiyozli tarif taqdim etilishi ko‘zda tutilgan", - dedi ILMA vakili.

Bu qadam davlat rahbari tomonidan avgust oyida belgilab berilgan siyosatning mantiqiy davomi bo‘lib, o‘shanda Qoraqalpog‘istonda mayningni amalga oshirish uchun maxsus zona yaratish to‘g‘risidagi qaror loyihasini ishlab chiqish topshirilgan edi. Ushbu zonaning rezidentlari uchun asosiy shart - "yashil", qayta tiklanadigan manbalardan ishlab chiqarilgan elektr energiyasidan majburiy foydalanish bo‘ladi. Bunday yondashuv nafaqat investitsiyalarni jalb qilish va raqamli sanoatni legallashtirishga, balki mintaqaning energiya tizimiga minimal yuklama bilan barqaror rivojlanishini ta’minlashga qaratilgan.

Shunday qilib, Qoraqalpog‘istonda sun’iy intellekt sohasidagi ishlanmalar va ekologik mas’uliyat tamoyillariga asoslangan sanoat mayningi birgalikda mavjud bo‘ladigan texnologik klaster yaratish uchun sharoitlar yaratilmoqda.

Kembrij Alternativ Moliya Markazi ma’lumotlariga ko‘ra, bitkoin mayningi uchun global elektr energiyasi iste’moli Pokiston yoki Niderlandiya kabi mamlakatlarning yillik energiya iste’moli bilan taqqoslanadi. "Yashil" manbalarga o‘tish butun sanoat uchun asosiy muammolardan biri hisoblanadi.