Wildberries O‘zbekistondagi logistik quvvatlarini kengaytirmoqda

Elektron tijorat bozorining asosiy ishtirokchilaridan biri bo‘lgan Wildberries kompaniyasi O‘zbekiston poytaxtida yangi yirik logistika majmuasi ishga tushirilganini e’lon qildi. Toshkent shahrining Sergeli tumanida joylashgan yangi obyekt kompaniyaning mintaqadagi operatsion jarayonlarini sezilarli darajada optimallashtirishga mo‘ljallangan.

Ikki blokdan iborat logistika markazi umumiy 53 ming kvadrat metr maydonni egallaydi. Uning loyihaviy quvvati kuniga yarim milliongacha buyurtmani qayta ishlash imkonini beradi, bu avvalgi saralash markazi imkoniyatlaridan besh baravar ko‘pdir. Ushbu majmuaning ishga tushirilishi mintaqa aholisi uchun 500 ga yaqin yangi ish o‘rni yaratilishiga olib keladi.

13-oktabrdan boshlab yangi ombor mahalliy sotuvchilardan tovarlarni qabul qilishni boshladi. Dastlabki bosqichda majmua bort balandligi 90 santimetrdan yuqori bo‘lgan transport vositalariga xizmat ko‘rsatadi, biroq yaqin kelajakda past bortli avtomobillarni qabul qilish uchun ham darvozalarni jihozlash rejalashtirilgan, bu esa hamkorlar uchun logistika imkoniyatlarini kengaytiradi. Kompaniya vakillarining ta’kidlashicha, markaz mahalliy tadbirkorlarning tovarlarini saqlashni va buyurtmalarni qayta ishlashning to‘liq siklini ta’minlaydi, bu esa yetkazib berish muddatlarini qisqartirishga bevosita ta’sir qiladi.

Wildberries’ning O‘zbekistondagi direktori Akmal Primqulovning ta’kidlashicha, yangi obyektning ishga tushirilishi kompaniya uchun strategik qadamdir. "Yangi logomarkaz xaridorlar uchun yetkazib berishni tezlashtirishga imkon beradi va mahalliy aholi uchun qo‘shimcha ish o‘rinlari yaratadi. Shuningdek, obyekt mahalliy ishlab chiqaruvchilarni qo‘llab-quvvatlashi va o‘zbek mahsulotlarining eksport salohiyatini kuchaytirishiga umid qilamiz", - dedi u.

Bu qadam kompaniyaning respublikadagi infratuzilmasini rejali ravishda kengaytirishning davomidir. Joriy yilning aprel oyida Toshkentda avvalgi Qibray tumanidagi obyekt o‘rnini egallagan yangi saralash markazi ochilgandi. Uning quvvati kuniga 100 minggacha buyurtmani qayta ishlash imkonini beradi va poytaxtdagi tarqatish punktlarigacha 12 soat ichida yetkazib berishni ta’minlaydi.

Bundan tashqari, iyun oyida Wildberries va Russ birlashgan kompaniyasining bosh ijrochi direktori Robert Mirzoyan yanada kengroq ko‘lamdagi ombor qurish rejalarini e’lon qildi. Gap Toshkent viloyatida 180 ming kvadrat metr maydonga ega majmua haqida bormoqda, buning uchun yer uchastkasi allaqachon ajratilgan. Ushbu loyihaga kiritilishi rejalashtirilgan investitsiyalar hajmi 150 million dollarga baholanmoqda.

O‘zbekistonda elektron tijorat bozori Markaziy Osiyodagi eng yuqori o‘sish sur’atlaridan birini namoyish etmoqda. Ayrim prognozlarga ko‘ra, 2027-yilga kelib uning hajmi 2 milliard dollarga yetishi, umumiy chakana savdodagi ulushi esa 10% gacha o‘sishi mumkin.