O‘zbekistonlik mutaxassis Raiffeisen Bank moliya direktori etib tayinlandi

O‘z faoliyatini O‘zbekiston Respublikasi Davlat mulkini boshqarish davlat qo‘mitasida boshlagan Kamila Mahmudova Markaziy va Sharqiy Yevropadagi yetakchi bank xoldinglaridan biri bo‘lgan Raiffeisen Bank International (RBI) ning moliya direktori (CFO) va boshqaruv a’zosi lavozimiga tayinlandi. Bu qaror Avstriya bankining Kuzatuv kengashi tomonidan 15-oktabr kuni qabul qilindi va bu haqda moliya tashkilotining matbuot xizmati xabar berdi.

Mahmudovaning yangi lavozimga kirishishi 2026-yil 1-yanvarga rejalashtirilgan. Biroq, uning tayinlanishi hali nazorat organlari tomonidan tasdiqlanishi kerak. Bu tayinlov bank boshqaruvi tarkibida alohida moliya direktori funksiyasining tiklanishini anglatadi.

Kamila Mahmudovaning bank sohasidagi professional yo‘li yigirma yildan ortiq davrni o‘z ichiga oladi. Uning Raiffeisen Bank bilan hamkorligi 2007-yilda qo‘shilish va sotib olish (M&A) bo‘limida boshlangan, u yerda kompaniyalarni sotib olish loyihalarini nazorat qilgan. 2019-yilda u korporativ rivojlanish va strategik boshqaruv bo‘limiga rahbarlik qilgan. Uning faoliyatidagi muhim bosqich 2021-yil dekabr oyida Chexiyadagi Raiffeisenbank moliya direktori lavozimiga tayinlanishi bo‘ldi.

Kamila Mahmudovaning ta’lim poydevori Toshkentda qo‘yilgan, u yerda 1997-yilda Jahon iqtisodiyoti va diplomatiya universitetini tamomlagan. Shuningdek, u AQShning Illinoys kollejida tahsil olgan va keyinchalik Vena iqtisodiyot va biznes universitetida "xalqaro soliq huquqi" mutaxassisligi bo‘yicha bilimlarini chuqurlashtirgan. 2019-yilda ayni shu o‘quv yurtida Executive MBA darajasini olgan. O‘sha yili u Minnesota universiteti qoshidagi Karlson menejment maktabida MBA dasturi bo‘yicha o‘qishni davom ettirgan.

Mahmudova o‘z faoliyatini Davlat mulki qo‘mitasida boshlagan, u yerda 1999-yildan 2001-yilgacha xususiylashtirish byurosida yuridik bo‘lim boshlig‘i lavozimida ishlagan. Shundan so‘ng u Jahon banki tarkibiga kiruvchi Xalqaro moliya korporatsiyasiga (IFC) maslahatchi lavozimiga o‘tgan va Raiffeisen Bankga kelguniga qadar shu yerda faoliyat yuritgan.

Raiffeisen Bank International boshqaruvining yangilangan tarkibi quyidagicha bo‘ladi:

Yoxann Shtrobl - bosh direktor (CEO) va chakana savdo yo‘nalishi rahbari;
Mari-Valeri Brunner - korporativ-investitsion bank mijozlariga xizmat ko‘rsatish (CIB Customer Coverage);
Andreas Gshventer - operatsion direktor / axborot texnologiyalari bo‘yicha direktor (COO/CIO);
Kamila Mahmudova - moliya direktori (CFO);
Xannes Myozenbaxer - risklar bo‘yicha direktor (CRO);
Rayner Shnabl - korporativ-investitsion mahsulotlar va yechimlar (CIB Products & Solutions).

Raiffeisen Bank International Avstriyadagi eng qadimgi bank guruhlaridan biri bo‘lib, uning tarixi 1927-yilga borib taqaladi.