O‘zbekiston energetika vaziri: "Yevropa Ittifoqi bilan energetika sohasidagi hamkorlik yangi bosqichga chiqmoqda"

Energetika vazirligi matbuot xizmati rasmiy xabar e’lon qildi.

Energetika vaziri Yevropa Ittifoqi bilan hamkorlik energetika sohasida yangi bosqichga chiqqanini ma’lum qildi. Xususan, dastlabki tarixiy kelishuvlar doirasida Yevropa kompaniyalarining to‘g‘ridan-to‘g‘ri investitsiyalari va ularning zamonaviy texnologiyalari O‘zbekistonga kirib keladi. Hozirda, energetikani ham o‘z ichiga olgan barcha yo‘nalishlarda Yevropa kompaniyalari - Siemens Energy, EDF, Voltalia, TotalEnergies - mamlakatimizda generatsiya quvvatlarini rivojlantirish bo‘yicha loyihalarda faol ishtirok etmoqda.

Yangi loyihalar doirasida Bryusselda (Belgiya) bo‘lib o‘tgan Global Gateway forumida O‘zbekiston, Qozog‘iston va Qirg‘iziston energetika vazirliklari hamda Yevropa tiklanish va taraqqiyot banki (YTTB) va Yevropa investitsiya banki (YIB) Qambarata GES-1 loyihasini moliyalashtirish yuzasidan o‘zaro anglashuv memorandumlarini imzoladi. Mazkur memorandumlarga muvofiq, YTTB 500 million AQSh dollari, YIB esa 200 million AQSh dollari ajratishi ko‘zda tutilgan va ushbu kelishuvlar bo‘yicha ishlar boshlangan.

Bundan tashqari, boshqa Yevropa moliyaviy institutlari bilan ham hamkorlik yo‘lga qo‘yildi. Xususan, imzolangan kelishuvlar doirasida elektr tarmoqlarini modernizatsiya qilish bo‘yicha Yevropa kompaniyalari va boshqa yetakchi moliyaviy institutlar bilan ishlashni tashkil etish haqida kelishuvga erishildi.

Ushbu loyihalar ishlab chiqarilgan elektr energiyasini iste’molchilarga minimal yo‘qotishlar bilan yetkazib berishga xizmat qiladi.

Shuningdek, gaz taqsimlash tizimlarini modernizatsiya qilish, yo‘qotishlarni kamaytirish va ularni samarali boshqarish bo‘yicha yetakchi italiyalik Pietro Fiorentini kompaniyasi bilan hamkorlik qilish yuzasidan kelishuvga erishildi.

Hozirda Germaniyaning Linde kompaniyasi bilan hamkorlikda "Navoiyazot" AJ hududida havo ajratish majmuasi qurilmoqda. Bu Linde’ning O‘zbekistondagi birinchi to‘g‘ridan-to‘g‘ri investitsiyasi hisoblanadi. Umuman olganda, mazkur yirik kompaniyalar bilan tuzilgan kelishuvlar ularning O‘zbekistonga bo‘lgan ishonchini va uzoq muddatli hamkorlikka tayyorligini tasdiqlaydi.