Andijonda bojxonachilar umumiy qiymati 1 milliard so‘mdan ortiq kontrabandani to‘xtatdi

Tovarlarni noqonuniy olib kirishga urinishning oldi olindi - Bojxona qo‘mitasining Andijon viloyati bo‘yicha boshqarmasi matbuot xizmati xabar berdi.

Andijon viloyatidagi "Do‘stlik" chegara bojxona posti xodimlari O‘zbekistonga kirib kelayotgan yuk avtomobillarini ko‘zdan kechirdi. Rentgen tekshiruvida yuk hujjatlarida ko‘rsatilgan narsalarga mos kelmaydigan tovarlar aniqlangan. Shundan kelib chiqib, qo‘shimcha tekshirish o‘tkazish to‘g‘risida qaror qabul qilindi.

Yuk avtomashinalari qo‘shimcha ko‘rikdan o‘tkazilganda yuk tashish hujjatlarida aks ettirilmagan jami 1 milliard 284 million so‘mlik 10 turdagi tovar aniqlangan. Yuk tashish hujjatlarida ko‘rsatilgan umumiy summa 181 000 yevroni tashkil qilgan.

Hozirda tergov harakatlari olib borilmoqda. Hodisa bilan bog‘liq barcha faktlar o‘rganilib, aniqlanguniga qadar tovarlar bojxona omborida vaqtincha saqlangan.