Toshkentda soxta davlat raqamlariga ega "BYD" aniqlandi

Toshkent shahar IIBB matbuot xizmati xabariga ko‘ra, poytaxtda soxta davlat raqam belgilaridan foydalangan avtomobil aniqlangan.

Ma’lum qilinishicha, Mirobod tumanida Ichki ishlar organlari xodimlari va Davlat xavfsizlik xizmati hamkorligida o‘tkazilgan tezkor-profilaktik tadbirlar chog‘ida "BYD" rusumli avtomobil to‘xtatilib tekshiruvdan o‘tkazilgan. Avtomobil maxsus ma’lumotlar bazasidan tekshirilganda, undagi davlat raqam belgisi tizimda ro‘yxatdan o‘tmaganligi ma’lum bo‘lgan. Keyinchalik ushbu raqam belgisi soxta ekani aniqlangan.

Shuningdek, avtomobil bagaj qismida avvaldan yechib olingan asl davlat raqam belgilari topilgan. Tekshiruv jarayonida fuqaro o‘z transport vositasiga ruxsatsiz ravishda chaqnoq chiroqlar va sirena o‘rnatgani, shuningdek, old oynasini qoraytirgani ham aniqlangan.

Mazkur holat yuzasidan O‘zbekiston Respublikasi Jinoyat kodeksining "Davlat raqam belgilari yoki avtomototransport vositalari va ularning tirkamalari (yarim tirkamalari) identifikatsiya raqamlarini noqonuniy tayyorlash, topshirish yoki ulardan foydalanish, shuningdek, ularni qalbakilashtirish"ga oid moddasi bilan jinoyat ishi qo‘zg‘atilgan.

Rasmiy ma’lumotga ko‘ra, gumondorga uch yilgacha ozodlikdan mahrum qilish jazosi qo‘llanilishi mumkin.