Andijonda mast holatda Nexia-2 haydovchisi YTH sodir etdi

Andijon viloyati YHXB IIB matbuot xizmati Baliqchi tumanida sodir bo‘lgan yo‘l-transport hodisasiga izoh berdi.

Joriy yilning 25 sentyabr kuni soat taxminan 23:20 larda Baliqchi tumanidagi "Markaz" mahalla fuqarolar yig‘ini hududida yo‘l-transport hodisasi sodir bo‘ldi. 2004-yilda tug‘ilgan Nexia-2 haydovchisi mast holatda va haydovchilik guvohnomasisiz Chinobod-Baliqchi yo‘nalishida harakatlanayotgan edi. Yuqori tezlik va xavfsiz masofani saqlamaganligi sababli chorrahada svetoforning qizil chirog‘ida to‘xtab qolgan ikkita avtomashina - Cobalt va Nexia-3 rusumli avtomashinalar bilan to‘qnashib ketgan.

To‘qnashuvda hech kim jabrlanmagan. Avtomobillarga jiddiy zarar yetgan. Hozirda tergov harakatlari olib borilmoqda.

Yo‘l harakati xavfsizligi boshqarmasining ta’kidlashicha, transport vositasini mast holda boshqarish uchun 40 bazaviy hisoblash miqdorining (16 480 000 so‘m) miqdorida jarima va 3 yilgacha transport vositasini boshqarish huquqidan mahrum qilish bilan jazolanadi.