Samarqandda Lacetti haydovchisi qizni urib yuborib, voqea joyidan qochib ketdi

Samarqand viloyati IIB Yo‘l harakati xavfsizligi boshqarmasi matbuot xizmati YTH sodir etgan shaxs aniqlangani haqida xabar berdi.

Joriy yilning 24 sentabr kuni taxminan soat 19:00larda Samarqand tumanida YTH sodir bo‘ldi. "Lacetti" rusumli avtomashina haydovchisi katta tezlikda ketayotib, yo‘l chetida ketayotgan 2010-yilda tug‘ilgan qizni urib yuborgan. To‘qnashuvdan so‘ng haydovchi tezligini ham pasaytirmagan va tezda voqea joyidan qochib ketgan. Haydovchi topilmagani uchun qizning onasi ijtimoiy tarmoqqa yordam so‘rab video joylashtirdi.

Tergov tadbirlari natijasida aniqlanishicha, YTH sodir etgan shaxs to‘qnashuvdan so‘ng avtomashinasini zararni bartaraf etish uchun xizmat ko‘rsatish markaziga olib borgan. Uning mashinasi hibsga olindi. Hozirda tergov harakatlari olib borilmoqda.

Hozirda jabrlanuvchi tibbiy muassasada. Uning hayoti xavf ostida emas. Jabrlanuvchining onasi huquq-tartibot idoralariga baxtsiz hodisa aybdorini qo‘lga olishda tezkor choralar ko‘rgani uchun minnatdorlik bildirdi.

YHXB IIB haydovchiga nisbatan qanday choralar ko‘rilishiga aniqlik kiritmadi.