Toshkent viloyatida yuk mashinasi haydovchisi o‘lchamlarini noto‘g‘ri hisoblab, ko‘prikning bir qismini buzdi

Toshkent viloyati Ichki ishlar bosh boshqarmasi Yo‘l harakati xavfsizligi boshqarmasi matbuot xizmati Zangiota tumanida yuz bergan yo‘l-transport hodisasiga izoh berdi.

Joriy yilning 26-sentabr kuni soat taxminan 19:00larda Toshkent viloyati Zangiota tumani Tariq Teshar mahallasi hududidan o‘tuvchi M39 "Toshkent-Termiz" avtomobil yo‘lida 1971-yilda tug‘ilgan "MAN" yuk mashinasi haydovchisi ko‘prik ostidan o‘tmoqchi bo‘lgan. Haydovchi transport vositalarining ruxsat etilgan o‘lchamlariga oid belgilar va boshqa belgilarga e’tibor bermay, ko‘prik ostidan haydagan. Oqibatda yuk mashinasining yuqori qismi ko‘prikning piyodalar o‘tish qismiga kelib urilgan va bu beton konstruktsiyasi yuk mashinasi ustiga qulagan.

Voqea sodir bo‘lganidan keyin Yo‘l harakati xavfsizligi boshqarmasi xodimlari zudlik bilan voqea joyiga yetib kelib, vaziyatni bartaraf etishdi. Hech kim jabrlanmagan, transport harakati tiklangan. Ayni paytda ko‘prikning shikastlangan qismini, aniqrog‘i, piyodalar o‘tish joyini tiklash ishlari olib borilmoqda. Huquq-tartibot idoralari xodimlari surishtiruv ishlarini olib bormoqda.