Navoiylik erkak YPX xodimi kiyimida reklama videosini suratga olgani uchun jarimaga tortildi

Huquqbuzarga nisbatan chora ko‘rildi - Navoiy viloyati IIB matbuot xizmati xabar berdi.

Ijtimoiy tarmoqlarda yo‘l harakati xavfsizligi xodimining kiyimi kiygani aks etgan video tarqaldi. Video joriy yilning iyul oyida Navoiy shahrida suratga olinib, joriy yilning avgust oyida Instagram’da tarqatilgani aniqlandi. Videodagi YPX kiyimi kiygan shaxsning so‘zlariga ko‘ra, video suratga olingan va reklama maqsadida ijtimoiy tarmoqlarga joylashtirilgan. U YPX kiyimi maxsus kiyimlar sotiladigan do‘kondan sotib olgan.

Mazkur shaxsga nisbatan O‘zbekiston Respublikasining Ma’muriy javobgarlik to‘g‘risidagi kodeksining "Vazirliklar, idoralar va tashkilotlar xodimlarining formali kiyim-boshini qonunga xilof ravishda kiyib yurish" moddasi bilan ma’muriy bayonnoma qo‘zg‘atildi. Unga bazaviy hisoblash miqdorining ikki baravari (824 000 so‘m) miqdorida jarima solindi. Qayd etilishicha, mazkur moddada bazaviy hisoblash miqdorining ikki baravaridan besh baravarigacha (824 000 so‘mdan 2 060 000 so‘mgacha) miqdorida jarima belgilanadi.