Termizda firibgar fuqaroga uyini buzish uchun tovon puli to‘lashni tezlashtirishga va’da berdi

Erkak naqd pul olayotgan vaqtda qo‘lga olindi - Bosh prokuratura departamenti matbuot xizmati xabar berdi.

Bosh prokuratura departamentining Termiz tumani bo‘limi xodimlari Davlat xavfsizlik xizmati xodimlari bilan hamkorlikda maxsus tezkor tadbir o‘tkazdi. O‘tkazilgan tezkor tadbir davomida "BD" MChJ baholash firmasi xodimi oldindan maxsus kimyoviy vosita bilan ishlov berilgan 900 AQSh dollari va 1 million so‘m naqd pulni olayotgan vaqtda qo‘lga olindi. Bu pul evaziga Mustaqillik mahallasidagi uyini buzish uchun 623 million so‘m tovon puli to‘lanishini tezlashtirishga yordam berishni va’da qilgan. U bu rejasini yuqori lavozimda ishlovchi tanishlari yordamida amalga oshirishni rejalashtirgan.

Mazkur holat yuzasidan O‘zbekiston Respublikasi Jinoyat kodeksining "Firibgarlik" va "Pora olishga yordam berish" moddalari bilan jinoyat ishi qo‘zg‘atilgan. Hozirda tergov harakatlari olib borilmoqda. Tergov natijasida qo‘lga olingan shaxsning shu kabi boshqa jinoyatlarga aloqadorligi aniqlanadi.