Surxondaryoda "Damas" rusumli avtomashina haydovchisi piyodalar o‘tish joyida to‘rt kishini urib yubordi

Surxondaryo viloyati IIB matbuot xizmati Sho‘rchin tumanida sodir bo‘lgan yo‘l-transport hodisasiga izoh berdi.

Joriy yilning 22-sentabr kuni taxminan soat 14:00larda Surxondaryo viloyati Sho‘rchin tumanidagi "Navro‘z" mahallasi hududidan o‘tuvchi 4K 592-yo‘lning 2-kilometrida YTH sodir bo‘ldi. 1998-yilda tug‘ilgan "Damas" rusumli avtomashina haydovchisi tartibga solinmagan piyodalar o‘tish joyidan yo‘lni kesib o‘tayotgan to‘rt nafar piyodani urib yubordi. Piyodalar tan jarohati olib, tuman tibbiyot markaziga yetkazilgan.

Hozirda tergov harakatlari olib borilmoqda. Jabrlanganlarning jarohati og‘irligini aniqlash uchun sud-tibbiy ekspertizasi tayinlangan. Shuningdek, transport vositasining texnik ekspertizasi ham o‘tkaziladi. Dastlabki ma’lumotlarga ko‘ra, avtohalokatga avtomobilni boshqarish vaqtida rulning nosozligi sabab bo‘lgan.

Surxondaryo viloyati IIB barcha haydovchilardan harakatlanishdan oldin transport vositalarining texnik holatini tekshirishni, chorrahalar, piyodalar o‘tish joylari va ta’lim muassasalariga yaqinlashganda ehtiyot choralarini ko‘rishlarini so‘radi.