O‘zbekistonning Novosibirskdagi Bosh konsulligi osiyolik shaxsning kaltaklanishi va haqoratlanishi tafsilotlarini o‘rganmoqda

Tashqi ishlar vazirligi matbuot xizmati O‘zbekistonning Novosibirskdagi Bosh konsulligiga tayanib, ijtimoiy tarmoqlarda tarqalgan ma’lumotlarga izoh berdi.

Ma’lum qilinishicha, joriy yilning 30 sentabr kuni Novosibirsk shahrining Lenin ko‘chasida bir guruh o‘smirlar osiyo millatiga mansub voyaga yetmagan bolaga hujum qilgan. Xabar qilinishicha, hujum paytida jinoyatchilar etnik haqoratlar bilan baqirgan. Jinoyatchilar jabrlanuvchini tiz cho‘kib, millati uchun kechirim so‘rashga majburlagan.

Rossiya Federatsiyasi Ichki ishlar vazirligining Novosibirsk viloyati bo‘yicha Bosh boshqarmasi ma’lumotlariga ko‘ra, hozirda tergov harakatlari olib borilmoqda. Xususan, jinoyatchilarning shaxsi aniqlanmoqda. Shuningdek, jabrlanuvchining shaxsi va fuqaroligi aniqlanmoqda.

O‘zbekiston Bosh konsulligi voqea yuzasidan batafsil ma’lumot so‘rab, diplomatik kanallar orqali huquqni muhofaza qiluvchi organlarga tegishli so‘rov yuborganini ta’kidladi. Jabrlanuvchining etnik kelib chiqishini aniqlash alohida ahamiyatga ega. Bu holat yaqindan nazorat qilinmoqda.