Payvandlash elektrodlari Toshkentda yashirin ishlab chiqarilgan

Yashirin ishlab chiqarilgan sexi fosh etildi - Bosh prokuratura departamenti matbuot xizmati xabar berdi.

Bosh prokuratura departamentining Uchtepa tumani bo‘limi xodimlari tomonidan tergov-tezkor tadbiri o‘tkazildi. Tezkor tadbir davomida taniqli brendning qalbaki payvandlash elektrodlarini ishlab chiqarayotgan yashirin sexi aniqlandi. Aytilishicha, jinoyatchilar savdo uchun mashhur "Arsenal" brendining qadoqlaridan foydalangan. Jinoyatchilar 66 o‘ram qalbaki payvandlash elektrodlarini boshqa mijozga sotayotgan vaqtda qo‘lga olindi.

Umumiy qiymati 855 million so‘mlik 36 760 dona turli xil payvandlash elektrodlari topilib, olib qo‘yildi. Shuningdek, qalbaki yorliqlar va yo‘riqnomalar musodara qilindi.

Mazkur holat yuzasidan O‘zbekiston Respublikasi Jinoyat kodeksining "Firibgarlik" va "Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish" moddalari bilan jinoyat ishi qo‘zg‘atilgan.