Navoiyda aylanmasi 100 milliard so‘mdan ortiq bo‘lgan noqonuniy kriptovalyuta ayirboshlash shoxobchasi aniqlandi

Kriptovalyuta ayirboshlash shoxobchasining noqonuniy faoliyati to‘xtatildi - IIV Kiberxavfsizlik markazi matbuot xizmati xabar berdi.

Ichki ishlar xodimlari Davlat xavfsizlik xizmati xodimlari bilan birgalikda Navoiy viloyatida maxsus tezkor tadbir o‘tkazdi. Olib borilgan tezkor tadbir davomida 1990, 1993, 1998, 1999-yillarda tug‘ilgan to‘rt nafar erkakdan iborat jinoiy guruh fosh etildi. Aniqlanishicha, jinoyatchilar ijtimoiy tarmoqlarda "1payment" va "P2P Trade" nomlari ostida kriptovalyuta ayirboshlash shoxobchasi tashkil qilgan. Jami 104 milliard so‘mlik operatsiyalarni amalga oshirishga muvaffaq bo‘ldi. Ular boshqa shaxsga tegishli bank kartalaridan foydalanganlar.

Jinoyatchilarning ashyolari ko‘zdan kechirilganda 68 dona bank kartalari, 12 dona mobil telefonlar, turli uyali aloqa operatorlarining sakkizta sim-kartalari, ikkita shaxsiy kompyuterlar topilgan.

Hozirda mazkur holat yuzasidan dastlabki tergov harakatlari olib borilmoqda. Jinoyatchilarning barcha harakatlari boshqa jinoyatlarga aloqadorligi har tomonlama tekshirilmoqda.