Sentyabr oyida O‘zbekistonda energiya resurslarni o‘g‘irlanishi natijasida 80,4 milliard so‘mlik zarar yetkazildi

Aniqlangan elektr energiyasi va tabiiy gazdan noqonuniy foydalanish holatlari bo‘yicha statistik ma’lumotlar e’lon qilindi - "O‘zenergoinspektsiya" matbuot xizmati xabar berdi.

Ma’lum qilinishicha, "O‘zenergoinspektsiya" hududiy boshqarmalari tomonidan huquq-tartibot idoralari xodimlari bilan hamkorlikda o‘tkazilgan tekshirishlar davomida joriy yilning sentabr oyida iste’molchilar tomonidan energiya resurslaridan noqonuniy foydalanish bilan bog‘liq 219 ta holat aniqlangan.

Xususan, 33,6 million kVt/soat elektr energiyasi va 9,4 million kub metr tabiiy gazning o‘g‘irlanishi fosh etildi. Elektr energiyasi uchun 52 milliard so‘m, tabiiy gazdan ko‘rilgan zarar 28,4 milliard so‘mni tashkil etdi. Bu esa jami zararni 80 milliard 473 million so‘mga yetkazdi.

Shuningdek, energiya resurslaridan foydalanish qoidalarini buzgan 546 nafar shaxsga nisbatan ma’muriy bayonnomalar rasmiylashtirildi.

To‘plangan barcha hujjatllar qonunbuzarlarga nisbatan tegishli qonuniy chora ko‘rish uchun huquqni muhofaza qiluvchi organlarga yuborildi.