Buxorodagi qog‘oz sexida 4,5 milliard so‘mlik tabiiy gaz o‘g‘irlab ketildi

Katta hajmdagi zarar aniqlandi - "O‘zenergoinspektsiya" matbuot xizmati xabar berdi.

Buxoro viloyati "O‘zenergoinspeksiya" boshqarmasi xodimlari viloyat prokuraturasi va gaz ta’minoti korxonasi xodimlari bilan hamkorlikda tekshiruvlar o‘tkazdi. Tekshiruvlar davomida Buxoro shahrida B.E. MCHJga tegishli qog‘oz ishlab chiqarish korxonasi tabiiy gazdan noqonuniy foydalanayotgani aniqlandi.

Mutaxassislar ushbu xulosalar asosida gaz ta’minoti korxonasiga yetkazilgan jami zarar 4 milliard 524 million so‘mni tashkil etganini aniqladi. Tegishli bayonnoma tuzildi.

Mazkur xolat yuzasidan to‘plangan barcha ish materiallari tergovga qadar tekshiruv o‘tkazish uchun huquqni muhofaza qilish organlariga yuborilgan. Aybdor deb topilgan shaxslar O‘zbekiston Respublikasi Jinoyat kodeksining "O‘g‘irlik" moddasi 4-qismi bilan 15 yilgacha ozodlikdan mahrum etilishi mumkin.

Tekshiruv harakatlari davom etmoqda.