Farg‘ona viloyatida transchegaraviy giyohvandlik bilan shug‘ullangan jinoiy guruh a’zolari qo‘lga olindi

Giyohvand moddalarni kontrabandasi va tarqatish bilan shug‘ullangan shaxslar qo‘lga olindi - IIV matbuot xizmati xabar berdi.

Farg‘ona viloyatida huquq-tartibot idoralari xodimlari Davlat xavfsizlik xizmati va bojxona boshqarmasi xodimlari bilan birgalikda maxsus tezkor tadbir o‘tkazdi. Olib borilgan tezkor tadbir davomida Dang‘ara tumanida narkotik moddalarni olib o‘tish va tarqatish bilan shug‘ullangan jinoiy guruhning uch nafar a’zosi qo‘lga olindi. Qo‘lga olinganlar orasida muqaddam sudlangan 1997-yilda tug‘ilgan ayol, 1989-yilda tug‘ilgan erkak va 1974-yilda tug‘ilgan ayol bor. Ular yo‘l chetidagi dalaga ko‘milgan o‘ramdagi narkotik moddalarni qazib olayotgan vaqtda qo‘lga olingan. Umumiy og‘irligi 4 kilogramm bo‘lgan jami to‘rtta o‘ram opiy aniqlanib, olib qo‘yildi. Aniqlanishicha, qo‘lga olinganlar Tojikiston va Qirg‘izistondan O‘zbekistonga narkotik moddalarni olib o‘tish bilan shug‘ullangan transchegaraviy jinoiy guruh a’zolaridir.

Mazkur holat yuzasidan O‘zbekiston Respublikasi Jinoyat kodeksining "Kontrabanda" va "Giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish" moddalari bilan jinoyat ishi qo‘zg‘atilgan. Jinoyatchilar 20 yilgacha ozodlikdan mahrum etilishi mumkin. Hozirda jinoiy guruhning qolgan a’zolarining shaxsi aniqlanmoqda.