Qashqadaryoda sifatsiz AI-80 benzini sotuvga chiqarildi

Sifatsiz neft mahsulotlarini sotayotgan yoqilg‘i quyish shoxobchasiga nisbatan choralar ko‘rildi - "O‘zenergoinspektsiya" matbuot xizmati xabar berdi.

"O‘zenergoinspektsiya"ning Qashqadaryo viloyati boshqarmasi xodimlari tomonidan tekshiruvlar o‘tkazildi. Tekshiruv davomida P.P. MChJga tegishli bo‘lgan yoqilg‘i quyish shoxobchasi faoliyati o‘rganildi. AYOQSh Qashqadaryo viloyati Qamashin tumanida joylashgan. Tekshiruv davomida AI-80 rusumli yoqilg‘i namunalari olinib, laboratoriya tahliliga jo‘natildi.

Laboratoriya xulosasiga ko‘ra, yoqilg‘i quyish shoxobchasida sifatsiz AI-80 benzini sotilgan. Yoqilg‘i davlat standartlariga javob bermagan.

Ushbu hodisa yuzasidan yoqilg‘i quyish shoxobchasi tegishli hujjatlarni tayyorlagan. Ularga 19,1 million so‘m jarima solindi. Jarima sotilgan past sifatli yoqilg‘ining umumiy qiymatining 50 foizini tashkil etdi. Aniqlangan qoidabuzarliklarni bartaraf etish yuzasidan yoqilg‘i quyish shoxobchasi rahbariyatiga ham buyruq berildi.