Samarqandlik tadbirkor gazni xavfli yo‘l bilan o‘g‘irladi

Tabiiy gazdan noqonuniy foydalanish holati aniqlandi - "O‘zenergoinspektsiya" matbuot xizmati xabar berdi.

"O‘zenergoinspektsiya" ning Samarqand viloyati boshqarmasi xodimlari viloyat prokuraturasi va huquqni muhofaza qilish idoralari xodimlari bilan birgalikda tekshiruvlar o‘tkazdi. Tekshiruv davomida Ishtixon tumanida joylashgan "Ch.T." oilaviy korxonasi faoliyati o‘rganildi. Tekshiruv natijasida tadbirkorlik subyekti tabiiy gaz hisoblagichini chetlab o‘tib, noqonuniy ravishda gaz ta’minotiga ulangani aniqlandi. Bundan tashqari, ulanish oddiy shlang yordamida xavfli tarzda amalga oshirildi.

Dastlabki hisob-kitoblarga ko‘ra, tabiiy gazdan noqonuniy foydalanish natijasida ko‘rilgan zarar 560,7 million so‘mni tashkil etgan. Ishning barcha materiallari tergovga qadar huquqni muhofaza qiluvchi organlarga taqdim etilgan. Jinoyat sodir etgan aybdorlar O‘zbekiston Respublikasi Jinoyat kodeksining "O‘g‘irlik" moddasi 4-qismi bilan 15 yilgacha ozodlikdan mahrum etilishi mumkin.