Andijonda ayollarning subsidiyalari o‘zlashtirildi

Andijon viloyatida subsidiyalarni o‘zlashtirish bo‘yicha jinoiy ish qo‘zg‘atildi - Korrupsiyaga qarshi kurashish agentligi matbuot xizmati xabar berdi.

Korrupsiyaga qarshi kurashish agentligi Andijon viloyatida tekshiruv o‘tkazdi. Tekshiruv davomida Vazirlar Mahkamasining 2023-yil 22-iyuldagi 307-son qaroriga asosan davlat tomonidan ajratilgan subsidiyalar o‘zlashtirilib yuborilgani aniqlandi. Jalolquduq tumani Kambag‘allikni qisqartirish va aholi bandligiga ko‘maklashish bo‘limi mansabdor shaxslari "S.T.X" MChJ direktori bilan til biriktirib, byudjet mablag‘larini o‘zlashtirgani aniqlandi.

Jinoyat sodir etgan shaxslar 25 nafar ishsiz ayollarni turli ijtimoiy daftarlarga, jumladan, "Temir daftar", "Ayollar daftar", "Yoshlar daftar" ko‘rsatib, Yagona ijtimoiy ta’minot reestriga ham kiritib, ish joyiga oid soxta hujjatlar taqdim etgan. Qayd etilishicha, ular kasanachi sifatida ro‘yxatga olinib, jami 247,5 million so‘mlik zarur tikuv jihozlari bilan ta’minlangan. Biroq, aslida, bularning hech biri sodir bo‘lmadi.

Mazkur holat yuzasidan Andijon viloyat prokuraturasi tomonidan jinoyat ishi qo‘zg‘atilgan. Hozirda tergov harakatlari olib borilmoqda.