1 milliard so‘mlik velosiped qismlarini noqonuniy ravishda O‘zbekistonga olib kirishga urindi

Tovarlarni noqonuniy olib kirishga urinish aniqlandi - Davlat bojxona qo‘mitasi Andijon viloyati bo‘yicha boshqarmasi matbuot xizmati xabar berdi.

Andijon viloyati "Do‘stlik" chegara bojxona posti xodimlari Qirg‘izistondan O‘zbekistonga kirib kelayotgan yuk avtomashinasini qo‘shimcha ko‘rikdan o‘tkazdi. Qayd etilishicha, tranzit deklaratsiyasi rasmiylashtirilgandan so‘ng yuk mashinasi xavfni baholash tizimi tomonidan "qizil" yo‘lakka ajratilgan. Shundan kelib chiqib, yuk mashinasi har tomonlama ko‘rikdan o‘tkazildi.

Tekshiruv davomida umumiy qiymati 10 000 AQSH dollari bo‘lgan 12 ta buyum orasida velosiped va mototsikllarning turli ehtiyot qismlari yashiringanligi aniqlangan. Yuk tashish hujjatlarida deklaratsiya qilinmagan tovarlarning umumiy qiymati 1 milliard 384 million so‘mni tashkil qilgan.

Hozirda mazkur holat yuzasidan dastlabki tergov harakatlari olib borilmoqda. Barcha aniqlangan tovarlar olib qo‘yilib, vaqtincha saqlash joylariga joylashtirildi.