Jizzaxdagi oilaviy korxona rahbari 15 yilga ozodlikdan mahrum etilishi mumkin

Elektr energiyasini o‘g‘irlash jinoyati fosh etildi - "O‘zenergoinspektsiya" matbuot xizmati xabar berdi.

"O‘zenergoinspektsiya"ning Jizzax viloyati boshqarmasi xodimlari viloyat prokuraturasi xodimlari bilan birgalikda tekshiruv ishlarini olib bordi. Tekshiruv davomida G‘allaorol tumanida joylashgan "A.U.B." oilaviy korxonasi faoliyati o‘rganildi. Tekshiruv davomida mazkur korxona elektr tarmog‘iga noqonuniy ulanganligi va elektr energiyasini tijorat maqsadida iste’mol qilgani aniqlandi.

Mutaxassislarning dastlabki hisob-kitoblariga ko‘ra, hududiy elektr ta’minoti tashkilotiga katta miqdorda zarar yetgan. Jami zarar 2 milliard 217 million so‘mni tashkil etdi.

Tegishli hujjatlar tuzilib, huquqni muhofaza qiluvchi organlarga taqdim etildi. Hozirda mazkur holat yuzasidan dastlabki tergov harakatlari olib borilmoqda. Qayd etilishicha, oilaviy korxona rahbari O‘zbekiston Respublikasi Jinoyat kodeksining "O‘g‘irlik" 4-qismi bilan 15 yilgacha ozodlikdan mahrum etilishi mumkin.