Toshkent metrosida tartibsizlikni keltirib chiqarganlar jazolandi

Huquqbuzarlar jazolandi - IIV Transport va turizm obyektlarida xavfsizlikni ta’minlash departamenti matbuot xizmati xabar berdi.

Yaqinda ijtimoiy tarmoqlarda Toshkent metrosida bir necha shaxslar turli iboralar, jumladan, behayo so‘zlar bilan baqirgani aks etgan video tarqaldi. Bu voqea toshkentliklar tomonidan keng qoralangan. Aniqlanishicha, voqea "Mashinosozlar" metro bekatida sodir bo‘lgan.

Ichki ishlar xodimlari tomonidan jinoyat sodir etgan shaxslar aniqlanib, ular yuzasidan Jinoyat ishlari bo‘yicha Yashnobod tuman sudida sayyor sud majlisi tashkil etildi. Sud majlisida huquqbuzarlarga kelgusida bunday xatti-harakatlarga yo‘l qo‘yib bo‘lmasligi haqida profilaktik suhbat o‘tkazildi.

Sud qaroriga ko‘ra, huquqbuzarlik sodir etgan ikki nafar voyaga yetmaganning ota-onasiga nisbatan O‘zbekiston Respublikasining Ma’muriy javobgarlik to‘g‘risidagi kodeksining "Bolalarni tarbiyalash va ularga ta’lim berish borasidagi majburiyatlarni bajarmaslik" moddasi bo‘yicha ma’muriy javobgarlik qo‘zg‘atildi. Yana to‘rt nafar katta yoshli shaxs O‘zbekiston Respublikasining Ma’muriy javobgarlik to‘g‘risidagi kodeksining "Mayda bezorilik" moddasi bilan aybdor deb topildi. Ularga bazaviy hisoblash miqdorining uch baravaridan (1 236 000 so‘m) miqdorida jarima solindi.