Andijon viloyatidagi bir xususiy klinikaga sifat kafolatlanmagan dori vositalari yetkazib berilgan

Sifat kafolatlanmagan dori vositalarining tarqalishiga chek qo‘yildi - Bosh prokuratura huzuridagi Departament matbuot xizmati xabar berdi.

Bosh prokuratura huzuridagi Departamentning Andijon viloyati bo‘limi xodimlari ichki ishlar organlari va bojxona boshqarmasi xodimlari bilan hamkorlikda maxsus tezkor tadbir o‘tkazdi. Tadbir davomida "Tracker" rusumli avtomobil to‘xtatilib, tekshirildi. Tekshiruv jarayonida ushbu avtomobilda sifatini va kelib chiqishini tasdiqlovchi hujjatlar bo‘lmagan 200 dona "Vokartin" dori vositasi tashilganligi aniqlangan. Qayd etilishicha, dorilar Izboskan tumani hududidagi bir xususiy klinikaga yetkazilayotgan edi. Shu bilan birga, jinoyatchilardan jami 3 525 dona, 16 turdagi turli dori vositalari musodara qilindi, ularning umumiy qiymati 216,8 million so‘mni tashkil etdi.

Mazkur holat bo‘yicha O‘zbekiston Respublikasi Jinoyat kodeksining "Sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish, dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish, shuningdek tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish" moddasiga asosan jinoyat ishi qo‘zg‘atildi.