Beparvo haydovchi ayol Namanganda to‘rtta farzandining hayotini xavf ostiga qo‘ydi

Huquqbuzar ayol jazoga tortildi - Namangan viloyati IIB YHXB matbuot xizmati xabar berdi.

Ijtimoiy tarmoqlarda Namangan viloyatining Mingbuloq tumanida yashovchi ayol tomonidan yo‘l harakati qoidalarining qo‘pol tarzda buzilgani aks etgan video tarqaldi. Fuqaro o‘zining "Nexia-3" rusumli avtomobilini boshqarayotgan paytda mobil telefon orqali o‘zini videoga olayotgan bo‘lgan. Shu bilan birga, uning qo‘lida emizikli bolasi bo‘lgan, yana uch nafar farzandi esa transport vositasining old o‘rindig‘ida o‘tirgan.

Mazkur holat yuzasidan fuqaro haqida O‘zbekiston Respublikasi Ma’muriy javobgarlik to‘g‘risidagi kodeksining "Transport vositasida odam tashish qoidalarini buzish" moddasining 1-qismi bo‘yicha ma’muriy bayonnoma rasmiylashtirildi. Ayolga ikki baravar bazaviy hisoblash miqdorida, ya’ni 824 ming so‘m miqdorida jarima qo‘llanilishi belgilangan.