Yangihayot tumanida "mulla" sifatida tanishtirgan taksichi ikki nafar qizga shahvoniy shilqimlik qilishgan

Oliy sud saytida Toshkent shahrida sodir bo‘lgan shahvoniy shilqimlik qilish holati bo‘yicha sud qarori e’lon qilindi.

Joriy yil 14-oktabr kuni Toshkent viloyati O‘rta Chirchiq tumanining "O‘rtasaroy" MFYda yashovchi, 1992-yilda tug‘ilgan fuqaro, yo‘lovchilarni shaxsiy mashinasida tashish bilan shug‘ullanuvchi haydovchi, jinsiy shahvoniy shilqimlik sodir etgan. Ma’lum bo‘lishicha, jabrlanuvchi tanishidan yomon tush ko‘rgani sababli uyiga mulla chaqirib berishni so‘ragan. Biroq tanishi o‘rniga mulla sifatida o‘zini tanishtirgan taksichi Toshkent shahri Yangi hayot tumanidagi uyga kelgan. Fuqaro unga 3 million 600 ming so‘m to‘lagan.

Ma’lum vaqt o‘tib, haydovchi avval jabrlanuvchining jiyaniga, sonlariga tegib, keyin esa jabrlanuvchining o‘ziga nisbatan ham shunday harakatlar qilgan va uni o‘pmoqchi bo‘lgan.

Joriy yil 21-oktabr kuni Yangihayot tuman jinoyat ishlari bo‘yicha sudining qaroriga ko‘ra, huquqbuzar O‘zbekiston Respublikasi Ma’muriy javobgarlik to‘g‘risidagi kodeksining "Shahvoniy shilqimlik qilish" moddasiga binoan aybdor deb topildi. Unga 5 sutka ma’muriy qamoq jazosi tayinlandi. Shuningdek, u maxsus qabulxonada saqlanishi uchun 309 ming so‘m to‘laydi.