Farg‘onalik fermerdan shartnoma tuzish evaziga "otkat" talab qilindi

Poraxo‘rlik holati bo‘yicha chora ko‘rildi - Korrupsiyaga qarshi kurashish agentligi matbuot xizmati xabar berdi.

Farg‘ona viloyatida joylashgan "B.Y" fermer xo‘jaligi rahbari Korrupsiyaga qarshi kurashish agentligi Call-markaziga murojaat qilgan. U shuni ma’lum qilganiki, uning fermer xo‘jaligi Toshkent shahar Yashnobod tumanidagi Obodonlashtirish bo‘limi bilan jami 261 million so‘mlik mahsulot yetkazib berish bo‘yicha shartnoma tuzgan.

Biroz vaqt o‘tib, fermer bilan Obodonlashtirish bo‘limi bosh buxgalteri sifatida tanishtirgan shaxs bog‘langan va shartnoma summasining 10 foizini, ya’ni 26 million so‘mni, shartnoma bo‘yicha mablag’ o‘tkazilishi evaziga talab qilgan.

Fermerning murojaatiga asoslanib, huquqbuzar belgilangan miqdordagi mablag‘ni olayotgan paytda ashyoviy dalillar bilan ushlangan. Ushbu holat bo‘yicha jinoyat ishi qo‘zg‘atilgan va tergov harakatlari olib borilmoqda.