Toshkent shahar IIB xodimi 50 ming dollar miqdoridagi porani rad etdi

Toshkent shahar IIB matbuot xizmati xabar berishicha, jinoyatchi va uning sheriklari ushlanib, ular ustidan tergov ishlari boshlangan.

Toshkent shahrida ichki ishlar organlari tomonidan maxsus tezkor tadbir o‘tkazilib, unda xalqaro onlayn-kazino platformasida ishlagan 4 nafar shaxs qo‘lga olingan. Jinoyatchilar kriptovalyuta operatsiyalari bilan shug‘ullanib, onlayn-platformaga mablag’ kiritish va chiqarish bilan bog‘liq harakatlar qilgan. Tintuv vaqtida ulardan 21 ta bank plastik kartasi, 1 ta noutbuk va 4 ta mobil telefon topilgan.

Tergov ishlari davomida jinoyatchilardan biri Toshkent shahar IIB xodimining xizmat kabinetiga kelib, 50 ming AQSh dollari miqdoridagi pora taklif qilgan. Shu evaziga u jinoyat ishining to‘xtatilishini rejalashtirgan va shu noqonuniy faoliyatni davom ettirishni maqsad qilgan.

Natijada jinoyatchi xizmat xonasida ushlangan va pora berish jarayonida qo‘lga olingan. Unga nisbatan O‘zbekiston Respublikasi Jinoyat kodeksining "Pora berish" moddasi bo‘yicha jinoyat ishi qo‘zg‘atilgan.