Firibgar Toshkentda butun bir oilani uy-joysiz qoldirdi

Toshkent shahar IIBB matbuot xizmati rasmiy bayonot e’lon qildi.

Ijtimoiy tarmoqlarda kelin bo‘lishi kutilayotgan ayolning butun oilasini aldagan va ularni uy-joysiz qoldirgan yigit haqida xabar tarqaldi. Ma’lum bo‘lishicha, 2024-yil avgust oyida 1997-yilda tug‘ilgan fuqaro 1999-yilda tug‘ilgan ayolga uylanishini va’da qilgan. Biroq u ayolga moliyaviy muammolari borligini aytib, 200 ming AQSh dollaridan ortiq miqdorda pul so‘ragan. Shunday qilib, u qizning otasiga tegishli uyini garovga qo‘yib, 240 ming AQSh dollari olgan va g‘oyib bo‘lgan.

Mazkur holat yuzasidan O‘zbekiston Respublikasi Jinoyat kodeksining "Firibgarlik" moddasining 4-qismi bo‘yicha jinoyat ishi qo‘zg‘atildi. Gumonlanuvchi qamoqqa olindi. Tergov davomida uning firibgarlik bilan bog‘liq boshqa jinoyatlarga ham aloqadorligi aniqlangan. Barcha jinoyatlar bo‘yicha tergov harakatlari to‘liq o‘tkazilgan.

Hozirda jinoyat ishining barcha materiallari Mirzo Ulug‘bek tuman jinoyat ishlari bo‘yicha sudiga qonuniy qaror qabul qilinishi uchun yuborilgan.