Surxondaryoda firibgar katta miqdordagi pulni olayotganida qo‘lga olindi

DXX matbuot xizmati xabar berishicha, firibgar qo‘lga olindi.

DXX xodimlari Bosh prokuratura huzuridagi Departamentning hududiy boshqarmasi xodimlari bilan hamkorlikda Surxondaryo viloyatining Bandixon tumanida yashovchi, 1987-yilda tug‘ilgan shaxsni qo‘lga oldi. Zarar keltiruvchi shaxs 110 ming AQSh dollari va 100 million so‘mni olayotgan vaqtda ushlangan. Aniqlanishicha, u jami 1,5 mlrd so‘m talab qilib, tuman hokimligi balansidagi yer uchastkasini fuqaro nomiga rasmiylashtirib berishni va’da qilgan. Fuqaro ushbu maydonda (3,5 gektar) chorvachilik bilan shug‘ullanishni rejalashtirgani qayd etildi. Ma’lum bo‘lishicha, gumonlanuvchi rejasini yuqori lavozimli tanishlari yordamida amalga oshirmoqchi bo‘lgan.

Holat yuzasidan O‘zbekiston Respublikasi Jinoyat kodeksining "Firibgarlik" moddasi 4-qismi bilan jinoyat ishi qo‘zg‘atildi. Gumonlanuvchiga 10 yilgacha ozodlikdan mahrum etish jazosi qo‘llanishi mumkin.