Qoraqalpog‘istonlik erkak boshqaning yer uchastkasini sotishga uringan

DXX matbuot xizmati xabariga ko‘ra, firibgarlik yo‘li bilan bitim tuzish urinishiga chek qo‘yildi.

DXX xodimlari Qo‘ng‘irot tumanida qishloq xo‘jaligi sohasida faoliyat yurituvchi tadbirkorni qo‘lga oldi. U Amudaryo tumanida yashovchi, 1983 yilda tug‘ilgan fuqaroning ishonchiga kirib, Taxiatosh tumanidan 50 gektar yer uchastkasini sotib berishni va’da qilgan hamda buning evaziga 50 ming AQSh dollari talab qilgan. Ma’lum bo‘lishicha, mazkur yer uchastkasi boshqa fuqaroga quyonchilikni rivojlantirish uchun ajratilgan 169 gektar maydonning bir qismiga tegishli bo‘lgan.

Huquqni muhofaza qilish organlari tadbirkorni 50 ming AQSh dollarini olayotgan paytda qo‘lga oldi. Holat yuzasidan O‘zbekiston Respublikasi Jinoyat kodeksining "Firibgarlik" moddasi 4-qismi bilan jinoyat ishi qo‘zg‘atildi; gumonlanuvchiga 10 yilgacha ozodlikdan mahrum etish jazosi qo‘llanishi mumkin.