Yunusobod tumanida erkak dori vositalarini noqonuniy sotgan

O‘zbekiston Respublikasi Bosh prokuraturasi huzuridagi Departament matbuot xizmati xabariga ko‘ra, dori vositalarining noqonuniy savdosi holati aniqlandi.

Bosh prokuratura huzuridagi Departamentning Yunusobod tuman boshqarmasi xodimlari DXX xodimlari bilan hamkorlikda maxsus tezkor tadbir o‘tkazdi. Tadbir davomida dori vositalarini noqonuniy savdoga qo‘ygan erkak qo‘lga olindi. U boshqa fuqaroga "Lestsinat" nomli dori vositasining 2 000 qadoqini sotayotgan paytda ushlangan. Ushbu miqdor uchun 170 million so‘m olish rejalashtirilgani ma’lum qilindi.

Holat yuzasidan O‘zbekiston Respublikasi Jinoyat kodeksining "Sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish, dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish, shuningdek tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish" haqidagi moddasi bo‘yicha jinoyat ishi qo‘zg‘atildi. Tergov harakatlari davom etmoqda.