Qibraydagi AGTKShda 6 mlrd so‘mlik tabiiy gazni o‘g‘irlash sxemasi o‘ylab topilgan

O‘zenergoinspeksiya matbuot xizmati xabariga ko‘ra, tabiiy gazdan noqonuniy foydalanish holati aniqlandi.

Toshkent viloyati O‘zenergoinspeksiya boshqarmasi xodimlari DXX xodimlari bilan hamkorlikda nazorat tadbirlarini o‘tkazdi. Tadbirlar davomida Qibray tumanida joylashgan "M. S." MChJga tegishli avtomobil gaz to‘ldirish kompressor shaxobchasi (AGTKSh) faoliyati o‘rganildi. Tekshiruv chog‘ida shaxobchasi mas’ullari tabiiy gaz iste’molini hisoblaydigan asbobga tashqi ta’sir ko‘rsatgani hamda uning ko‘rsatkichlarini kamaytirish uchun cheklovchi qurilma o‘rnatgani aniqlangan. Natijada 5 milliard 972 million so‘m miqdorida zarar yetkazilgan noqonuniy iste’mol holati qayd etildi.

Mazkur holat bo‘yicha tegishli hujjatlar rasmiylashtirilib, huquqni muhofaza qiluvchi organlarga tergovga qadar tekshiruv o‘tkazish uchun yuborildi. Aybdorlarga nisbatan O‘zbekiston Respublikasi Jinoyat kodeksining "O‘g‘rilik" moddasi 4-qismi bo‘yicha 15 yilgacha ozodlikdan mahrum qilish jazosi qo‘llanilishi mumkin.