Xorazmda kontrabanda elektron sigaretlarning yirik partiyasi musodara qilindi

Bosh prokuratura huzuridagi Departament matbuot xizmati xabariga ko‘ra, kontrabanda elektron sigaretlar savdosiga chek qo‘yildi.

Bosh prokuratura huzuridagi Departamentning Yangiariq tuman boshqarmasi xodimlari maxsus tezkor tadbir o‘tkazdi. Tadbir davomida "H.P." MChJ do‘koni sotuvchisi xorijda ishlab chiqarilgan 3 dona kontrabanda elektron sigaretani 800 ming so‘mga sotayotgan paytda qo‘lga olindi. Shundan so‘ng olib borilgan tezkor tadbir doirasida Urganch shahri "Islomobod" MFY hududidagi yashash uyi ko‘zdan kechirilib, 8 405 dona elektron sigareta, nikotinli plastirlar va elektron sigaretalar uchun 32 turdagi suyuqlik aniqlanib, musodara qilindi.

Mazkur holat yuzasidan O‘zbekiston Respublikasi Jinoyat kodeksining "Etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish" haqidagi moddasi bo‘yicha jinoyat ishi qo‘zg‘atildi. Tergov harakatlari davom etmoqda.