Samarqandlik erkakdan BYD rusumli avtomashina olib qo‘yildi

Qidiruvdagi avtomashina topildi - Samarqand viloyati Majburiy ijro byurosi matbuot xizmati xabar berdi.

Majburiy ijro byurosiga fuqarolik ishlari bo‘yicha Samarqand shahar sudidan ijro hujjati kelib tushgan. Hujjatga ko‘ra, erkakning bankdan 318 million so‘m qarzi bo‘lgan.

Qarzdor tomonidan qarzni ixtiyoriy ravishda qaytarish bo‘yicha belgilangan muddatda ijro hujjatini bajarmaganligi sababli va amaldagi qonunchilikka asosan ushbu shaxsning BYD rusumli avtomashinasi qidiruvga berilgan. Byuro tergov bo‘limi tomonidan olib borilgan surishtiruv ishlari natijasida qarzdorga tegishli "BYD" rusumli avtomashina Jomboy tumanida aniqlandi.

Hozirda transport vositasi talabga binoan vaqtincha saqlash uchun olib qo‘yilib, ijro hujjati ijrosini ta’minlash yuzasidan tegishli choralar ko‘rilmoqda. Qarzdorning avtomobili onlayn-auksionda sotilishi mumkin.