Andijonda o‘n minglab spirtli ichimliklar yo‘q qilindi

Zararlangan alkogol mahsulotlari yo‘q qilindi - Andijon viloyati Majburiy ijro byurosi matbuot xizmati xabar berdi.

Majburiy ijro byurosi xodimlari tomonidan kontrafakt alkogol mahsulotlarini yo‘q qilish amaliyoti o‘tkazildi. Jami 74 577 dona, 65 turdagi alkogol mahsuloti yo‘q qilindi, ularning umumiy qiymati 1 milliard 600 million so‘mni tashkil etdi. Ish materiallariga ko‘ra, Andijon viloyati hududida faoliyat yuritayotgan bir nechta mas’uliyati cheklangan jamiyatlar noqonuniy ravishda sifatsiz alkogol mahsulotlarini ishlab chiqarib, naqd pul evaziga sotganlari, shuningdek, soliqlar va boshqa majburiy to‘lovlardan qochganlari aniqlangan.

Shu sababli, Zangiota tumanining jinoyat ishlari bo‘yicha sudi ijro hujjatiga asosan, A.A. va boshqa shaxslar bilan bog‘liq jinoyat ishi bo‘yicha dalil sifatida olingan 74 577 dona, 65 turdagi va hajmdagi alkogol mahsulotlarini yo‘q qilish belgilangan.

Ushbu ijro hujjatining bajarilishini ta’minlash maqsadida Andijon shahar Majburiy ijro byurosi vakillari va tegishli idoralar ishtirokida ijro harakatlari o‘tkazilib, belgilangan tartibda jami 74 577 dona alkogol mahsuloti yo‘q qilindi.