Qishda nima bo‘ladi? Nega toshkentliklarga "haqiqiy" issiq suv berilmayapti?

Toshkentda issiq suv bilan bog‘liq muammolar haqida avvalroq xabar bergan edik. Ko‘p qavatli uylarda yashovchilar suv haroratining pastligi va suvining iflosligidan shikoyat qilmoqda.

"Hammasi profilaktika ishlari to‘xtatilganidan keyin boshlandi. Shundan so‘ng suvning harorati pasayib ketdi, endi bizda issiq emas, iliq suv bor. Yana bir necha kun suvimiz butunlay iflos edi. O‘ylaymanki, bu hozir poytaxt uchun oddiy holat va yaqin orada biz haqiqiy issiq suv olmaymiz. Hokimlik qayerga qarayapti?", - deydi Yunusobod tumanida yashayotgan fuqaro.

Yana bir fuqaro "Xalq nazorati" bilan bog‘langanidan keyin bir necha kun davomida issiq suv bo‘lganini aytib berdi. Biroq shikoyatini bekor qilishi bilanoq issiq suv yana o‘chib qoldi.

"Men Yunusobodda yashayman, yaqinda suv haroratidan shikoyat qildim. Ular kelib tuzatdi - shikoyatni bekor qilishimni so‘radilar, chunki muammoni hal qilishdi. Biroq, bir-ikki kundan keyin yana jo‘mrakdan iliq suv chiqa boshladi. Men yana "Xalq nazorati" bilan bog‘landim, hozir natijani kutyapman", - deydi fuqaro.

Eslatib o‘tamiz, avvalroq toshkentliklar Facebook’dagi mashhur "Potrebitel" (Iste’molchi) guruhida issiq suv haroratidan shikoyat qilgan edi.