Toshkentlik erkakga tilanchilik uchun hukm o‘qildi

Oliy sud rasmiy saytida e’lon qilingan hukm nusxasiga ko‘ra, Toshkentda tilanchilik bilan shug‘ullangan erkakka nisbatan hukm chiqarildi.

Joriy yil 2-oktabr kuni Sergeli tuman jinoyat ishlari bo‘yicha sudida 1960-yilda tug‘ilgan tuman fuqarosiga hukm o‘qildi. Erkak ilgari sudlanmagan, uch farzandi borligi qayd etildi.

Aniqlanishicha, 21-iyul kuni u Sergeli tumanidagi ko‘chalardan birida tilanchilik qilgani uchun ma’muriy javobgarlikka tortilgan. Tegishli xulosalarni chiqarmagan holda, 4-avgust kuni "Qipchoq" va "Sofdil" ko‘chalari kesishmasida yana tilanchilik qilayotgani aniqlangan. Uning yonidan haydovchilar va yo‘lovchilardan olgan 720 ming so‘m topilgan. Shu asosda jinoyat ishi qo‘zg‘atilgan.

Sud hukmiga muvofiq, erkak O‘zbekiston Respublikasi Jinoyat kodeksining "Tilanchilik qilish" moddasi 1-qismi bo‘yicha aybli deb topilib, 3 oy muddatga ozodlikni cheklash jazosi tayinlandi. Mahkumga faqat ish joyiga yoki tibbiyot muassasalariga borish uchun uydan chiqishga ruxsat etilib, so‘ng uyiga qaytishi shartligi belgilandi. Shuningdek, undan olingan 720 ming so‘m davlat daromadiga o‘tkazilishi ko‘zda tutilgan.